allt að gerast

Já hvur andskotinn - ég er bara að koma heim! Jább þriðjudaginn 25. júlí rétt fyrir miðnætti kem ég, eftir næstum 8 mánaða útlegð. Ég sem er búin að hlakka til er eitthvað að fá stresskast, sem ég skil ekki!
En eins og ég segi margt hefur gerst og margt er að gerast. Fyrst og fremst urðu Ítalir heimsmeistarar - hver hefði vitað að fótbolti gæti verið rómantískur!?! Ég og Udi horfðum á leikin saman og vorum næstum ein á einum barnum hér, sátum fremst og héldumst í hendur allan tímann. Síðan fögnuðum við með Ítölum hér í Tübingen eftir leikinn og áttum yndislegt kvöld saman!
Jæja síðan höfum við stelpurnar verið að taka djammið hér með trompi og ég er eiginlega komin með smá ógeð - djömmum of harkalega!
<- sveitt á djamminu!


Ég er að vinna í brúnkunni, en það gengur svaka hægt! Skil þetta ekki, ég held að ég sé bara eitthvað gölluð, verð barasta ekkert brún! Ég sem ætlaði að vera orðin svaka skvísa áður en ég kæmi heim og "glenna" brúnkuna framan í glæra Íslendinga! Hef viku til stefnu, er að spá í að henda sólarvörninni og taka upp olíuna og vera bara ekta Íslendingur og hætta að læðast eftir húsveggjum þegar það er hvað heitast og bara vera hörð og ALLTAF vera í sólinni. Það er bara búið að vera of heitt og ógeðslegt að vera ALLTAF sveitt. jakk! EN aftur á móti ég vona að ég taki eitthvað af veðrinu með mér, svona handa ykkur : )
Jæja svo eru próf í þessari viku þannig að ég hef nóg að gera, semja próf, fara yfir og svo gefa út einkunnarblöð.
En núna ætla ég að fara út að skokka og gera Heidi Klum æfingar - maður á að verða eins og hún ef maður gerir þessar æfingar í 14 daga!

kvöldið

Ætlaði að taka mig til og skrifa hér eitthvað skemmtilegt fyrir ykkur fáu en dyggu lesendur, en síðan áttaði ég mig á því að klukkan er orðin og ég þreytt.
Hér er bara fótbolti fótbolti og er rosa gott að fá þessi tvö fótboltalausu kvöld núna, þá fæ ég smá athygli frá kallinum!

Annars ætlum við stúlkurnar hér að skella okkur til Stuttgart á laugardaginn, stelpudagur!! Stefnan tekin á H&M og Pizza Hut Hut Hut! Svo á sunnudaginn ætlar Zack að halda upp á 4th of july, en samt sko 2. júlí af því að það kemst enginn á þriðjudaginn! En hann ætlar að grilla all american burgers og það verður svaka stööööð.
þangað til...

Sviti sviti svitabað

Mér er heitt og það er engin undankomuleið. Ég fór í kalda sturtu - ég fer aldrei í kalda sturtu. En ég get víst ekki verið í sturtu í allan dag. Ég reyni því að vera inni - en ég er fátæk, ég er ekki með neina loftræstingu. Mér er heitt.
Það var jú 17. júní í gær. Ég var búin að segja nemendum mínum frá því öllu, hittingur á Þingvöllum, Jón forseti og rigningin - hæ hó. Við hittumst síðan upp á Österberg í gær og grilluðum, það var yndislegt. Ég og Gunna gerðum okkur spjót með grænmeti og kjöti og svo var drukkuð vín í blíðskapar veðri, yndislegt. Ég á von á myndum frá Zack þar sem mín myndavél tók sér frí og koma þér vonandi innen alt for lange. Síðan horfði ég á Ítalíu - USA með Ehúði mínum og eftir það skelltum við Gunna okkur á skrall langt fram á morgun. Það er ömurlegt að vera þunnur í svona hita.
Klukkan er orðin fimm ég ætla að vona að það fari nú að kólna. Mér er heitt.
Og já, til að ljúka hinni feykispennandi launamálasögu - ég er búin að fá útborgað!!! Það gekk fyrir rest og vil ég þakka veittan stuðning.
Góðar stundir

Getur maður orðið einn af þeim?

Ég reyni og reyni og reyni að láta mér líka við þjóðverjann, en þeir gera mér svo gasalega erfitt fyrir! Auðvitað eru yndislegir þjóðverjar inn á milli sem ég kýs að kalla vini mína, en æi! Í dag er t.d. 6. júní og ég er ekki enn búin að fá útborgað! Og þá meina ég ekki að ég átti að fá útborgað 1. júní og 5 dögum of seint, neiiii ég meina að ég er ekki heldur búin að fá borgað það sem ég átti að fá útborgað 1. maí!!!! aaaaaaaaaarrrrrrrrrrrrrrrrg! Og svo segir þessi á þessari skrifstofu "já sko" ,(allt í monotón), " ég get ekkert fyrir þig gert fyrr en pappírarnir þínir koma hingað", ég:"já hvar eru helvítans pappírarnir?" "já ég veit það ekki", "nei einmitt, auðvitað ekki", klikk. Hring, hring - næsta skrifstofa "já nei pappírarnir eru ekki hér, þeir voru sendir aftur yfir til deutsche Seminar", sem sé pappírarnir mínir komnir á þá skrifstofu sem þeir byrjuðu á og afhverju? Jú því að konan á skrifstofunni út gleymdi að láta mig fylla út eitt blað! Svo voru þeir aftur sendir á skrifstofu #2 og ég býst við því að fá útborgað strax eftir þetta vesen, en það eru liðnar fokking TVÆR vikur síðan þetta var!! Á föstudaginn hitti ég reyndar gasalega næs konu, sem að sjálfsögðu getur ekki verið að vinna á þeim skrifstofum sem ég þarf að fara á, en var bara að labba framhjá og sá mig hárreyta sjálfa mig fyrir framan lokaðar dyr hjá skrifstofu #2 og spurði hvort hún gæti aðstoðað. Ég stóð auðvitað agndofa og starði á hana, er þjóðverji, sem í raun kemur málið alls ekki við, að bjóðast til að aðstoða mig!!?? Ég fékk næstum tár í augun, enda löngu orðin afar þreytt og pirruð á þessu máli! Konan leitaði í nokkrum bunkum, sem aðrir á skrifstofunni gátu ekki gert - pappírarnir kæmi í ljós þegar að þau væru búin að vinna niður þessa bunka, og hún fann pappírana mína! Ég var svo glöð því að nú gætu þeir haldið áfram yfir á skrifstofu #3 sem sér um peningamálin og útborgun!! Ég skoppaði um af gleði. En að sjálfsögðu var mölfluga í hveitinu "Já hér eru pappírarnir yðar, en þér vitið þó að Unikasse er lokaður eftir hádegi og í dag er föstudagur og á mánudaginn er frí þannig að þér ættuð að geta fengið útborgað, ja í fyrsta lagi á þriðjudaginn í næstu viku. " Ég náði að stilla mig, kreista fram bros og þakka kærlega fyrir mig.
Í dag er því dagurinn, dómsdagur, mun ég fá útborgað eða neyðist ég til að taka til minna ráða og TRYLLAST??
farin í hraðbankann

Ach du lieber Gott!

Enn einu sinni er ég komin í þennan vítahring, leiðist en er of löt til að gera eitthvað í því! Eða kannski minna löt og meira þreytt enda er þriðjudagur sá dagur sem ég vakna klukkan 8 og kem ekki heim aftur fyrr en kl. 8 og þá búin að vera að kenna í allan dag. Búin að drekka 3 bolla af kaffi í dag, sem er andskoti mikið miðað við það að ég er ekki svona verð-að-fá-bolla-á-dag manneskja. En það skrítna er að ég verð bara þreytt á að drekka kaffi - er það ekki soldið mikið skrítið?

Hvað er annars að frétta? Tja (já Tja! er kúl, jafnvel þó Þorsteini Guðmundssyni, sem mér finnst jú æði, finnist það ekki), það er nú ekki mikið, ég horfði jú á Eurovision og er mjög sátt við úrslitin. Ég verð nú að segja að ég var nú smá pínku ponsu hneyksluð á pjötlunum sem sumar klæddust þarna á sviðinu og fannst mér því frábært að ófrýnileg skrímsli hafi hreppt hnossið. En svona er þetta víst orðið, þú selur ekki plötu nema þú sýnir vel af holdi.
Mér fannst reyndar þýska lagið alveg rosa cute, en æi er Eurovision ekki að missa "it's flare"? Texas lightning from Germany?? Er þa? Og svo náttla öll austantjaldslöndin kjósa bara hvort annað! Og svo t.d. gáfu Þjóðverjar Tyrklandi 12 stig - afhverju?? Jú það eru nú yfir 2 milljónir tyrkneskra innflytjenda hér. Og svona er þetta bara að verða! Er ekki best að fá bara dómara aftur í þetta, held að almenningur ráði ekki við þetta vald sem hann hefur.

Jæja klukkan er orðin.

Early riser

Sælt veri fólkið.
Ég get svo svarið það! Haldiði að ég hafi ekki vaknað í morgun svona semihress, ekkert alltof erfitt að fara fram úr eins og svo oft. Fékk mér að borða, gerði mig tilbúna og skellti mér svo hingað niður í skóla. Hafði ákveðið að mæta klukkutíma fyrir kennsluna til að leggja lokahönd á undirbúning. Ég var meira að segja að þessu sinni búin að ljósrita allt og allt tilbúið og ég átti enn fimm mínútur til stefnu. Ég ákvað nú samt bara að labba niður í kennslustofu og koma mér fyrir. Þegar ég opna síðan stofuna þá situr þar inni bláókunnugt fólk! Ég var nokk pirruð á því að tíminn á undan virtist eitthvað hafa ílengst og að ég þyrfti kannski að fara að ybba gogg. Þá datt mér í hug - nei það getur ekki verið! Júbb ég var mætt klukkutíma OF SNEMMA!
Ég var að spá hvort ég ætti bara að halda þessu fyrir sjálfa mig, enda frekar pínlegt, en þar sem ég er nú þegar komin út úr skápnum þá finnst mér í lagi að deila þessu - útskrifaður Þjóðverji og bara stolt af því.
En ég slapp allavega inn í hús áður en það byrjaði að rigna!
Svo átti hann Ási bróðir minn afmæli í gær, orðin allt of gamall 34 ára!! Í gær var líka þjóðhátíðardagur Norðmanna og hann Ási er svo sniðugur að hann er einmitt giftur einni hálfnorskri!
En svo í dag á hún Gunna afmæli!! Stóra 2-5! Til hamingju með daginn Gunna mín og mundu: þú lítur út eins og api og lyktar eins og einn líka!

Ég er náttla eins og flestir Íslendingar svaka spennt að vita hvort Silvía syngji "fucking" eða ekki! Ég ætla að sjálfsögðu að horfa í kvöld, þ.e.a.s. ef ég næ helvítans stöðinni, en þátturinn er víst sýndur á einhverji norður þýskri stöð sem við hér í suðrinu námum kannski ekki - bögg. Eeeeen mal sehen! Kannski get ég þá fylgst með á netinu.

Annars er ég búin að vera með smá heimþrá undanfarið! Var að kenna á þriðjudaginn og þrisvar sinnum meðan ég var að skrifa á töfluna gerðist það að ég skaust snöggvast til Íslands í huganum, mjög skrítið, svona eins og í sekúndubrot var ég heima! En það fer nú að styttast í mig ég kem eftir 2 mánuði og 9 daga!

Jæja núna eru ennþá 15 mínútur í að tíminn byrji, og ég búin með það sem ég get sagt. Best að fara bara að lesa perez...

Tveggja vikna fresti, er það slæmt?

Góðan dag gott fólk.
Í dag er mánudagur, sem þýðir aðeins eitt - þrif. Jább á mánudögum er ég "Putzfrau" og tek til í greninu ógurlega. Ég tek fyrst lest til Reutlingen, 10 mín og svo tek ég strætó í næstum klukkutíma, sem líður reyndar rosalega fljótt. Ég hef nefnilega nóg að skoða í strætóferðinni, það er ekki nóg með það að leiðin sem við förum er alveg rosaleg falleg, heldur er alltaf sama fólkið með mér í strætó, sem er alltaf troðfullur og þarf ég að standa stundum hálfa leiðina. Afhverju þurfa Þjóðverjar að vera svona hallærislegir?? Ein samferðakona mín er svo föst in the eigthies og fílar það. Önnur klæðir sig eins og hún sé sjötug en er rétt um þrítugt, situr alltaf með fílusvip og skoðar fólkið í kringum hana, munurinn á okkur er sá að hún gerir það með mjög svo gagnrýnu augnaráði, já ég veit ég er að gagnrýna, en ég er útlendingur, ég má, auk þess hef ég gaman að þessu og brosi til fólks. Svo er það stelpan sem sefur alltaf í strætó og missir ALLTAF af stoppinu sínu, magnað. Feiti feiti sem þarf tvö sæti, sem er stórmerkilegt, sérstaklega því mér finnst þýskt fólk flest allt bara mjög fit, því stendur feitt fólk virkilega út. Einn strákurinn lítur alveg út eins og Yu-Ki-Oh. Mismunandi fólk mætti áfram telja, en eitt eiga þau öll sameiginlegt - þau eru öll í ljótum skóm.
Jæja svo kem ég á leiðarenda og þríf í 4 klst. - jakk. Svo fer ég heim og ligg vanalega að drepast í bakinu allt kvöldið uppí rúmi því ég hamast svo þessa 4 tíma til þess að ná að gera sem mest.
Núna þarf ég að drífa mig, lestin fer eftir 15!