Ach du lieber Gott!

Enn einu sinni er ég komin í þennan vítahring, leiðist en er of löt til að gera eitthvað í því! Eða kannski minna löt og meira þreytt enda er þriðjudagur sá dagur sem ég vakna klukkan 8 og kem ekki heim aftur fyrr en kl. 8 og þá búin að vera að kenna í allan dag. Búin að drekka 3 bolla af kaffi í dag, sem er andskoti mikið miðað við það að ég er ekki svona verð-að-fá-bolla-á-dag manneskja. En það skrítna er að ég verð bara þreytt á að drekka kaffi - er það ekki soldið mikið skrítið?

Hvað er annars að frétta? Tja (já Tja! er kúl, jafnvel þó Þorsteini Guðmundssyni, sem mér finnst jú æði, finnist það ekki), það er nú ekki mikið, ég horfði jú á Eurovision og er mjög sátt við úrslitin. Ég verð nú að segja að ég var nú smá pínku ponsu hneyksluð á pjötlunum sem sumar klæddust þarna á sviðinu og fannst mér því frábært að ófrýnileg skrímsli hafi hreppt hnossið. En svona er þetta víst orðið, þú selur ekki plötu nema þú sýnir vel af holdi.
Mér fannst reyndar þýska lagið alveg rosa cute, en æi er Eurovision ekki að missa "it's flare"? Texas lightning from Germany?? Er þa? Og svo náttla öll austantjaldslöndin kjósa bara hvort annað! Og svo t.d. gáfu Þjóðverjar Tyrklandi 12 stig - afhverju?? Jú það eru nú yfir 2 milljónir tyrkneskra innflytjenda hér. Og svona er þetta bara að verða! Er ekki best að fá bara dómara aftur í þetta, held að almenningur ráði ekki við þetta vald sem hann hefur.

Jæja klukkan er orðin.

Early riser

Sælt veri fólkið.
Ég get svo svarið það! Haldiði að ég hafi ekki vaknað í morgun svona semihress, ekkert alltof erfitt að fara fram úr eins og svo oft. Fékk mér að borða, gerði mig tilbúna og skellti mér svo hingað niður í skóla. Hafði ákveðið að mæta klukkutíma fyrir kennsluna til að leggja lokahönd á undirbúning. Ég var meira að segja að þessu sinni búin að ljósrita allt og allt tilbúið og ég átti enn fimm mínútur til stefnu. Ég ákvað nú samt bara að labba niður í kennslustofu og koma mér fyrir. Þegar ég opna síðan stofuna þá situr þar inni bláókunnugt fólk! Ég var nokk pirruð á því að tíminn á undan virtist eitthvað hafa ílengst og að ég þyrfti kannski að fara að ybba gogg. Þá datt mér í hug - nei það getur ekki verið! Júbb ég var mætt klukkutíma OF SNEMMA!
Ég var að spá hvort ég ætti bara að halda þessu fyrir sjálfa mig, enda frekar pínlegt, en þar sem ég er nú þegar komin út úr skápnum þá finnst mér í lagi að deila þessu - útskrifaður Þjóðverji og bara stolt af því.
En ég slapp allavega inn í hús áður en það byrjaði að rigna!
Svo átti hann Ási bróðir minn afmæli í gær, orðin allt of gamall 34 ára!! Í gær var líka þjóðhátíðardagur Norðmanna og hann Ási er svo sniðugur að hann er einmitt giftur einni hálfnorskri!
En svo í dag á hún Gunna afmæli!! Stóra 2-5! Til hamingju með daginn Gunna mín og mundu: þú lítur út eins og api og lyktar eins og einn líka!

Ég er náttla eins og flestir Íslendingar svaka spennt að vita hvort Silvía syngji "fucking" eða ekki! Ég ætla að sjálfsögðu að horfa í kvöld, þ.e.a.s. ef ég næ helvítans stöðinni, en þátturinn er víst sýndur á einhverji norður þýskri stöð sem við hér í suðrinu námum kannski ekki - bögg. Eeeeen mal sehen! Kannski get ég þá fylgst með á netinu.

Annars er ég búin að vera með smá heimþrá undanfarið! Var að kenna á þriðjudaginn og þrisvar sinnum meðan ég var að skrifa á töfluna gerðist það að ég skaust snöggvast til Íslands í huganum, mjög skrítið, svona eins og í sekúndubrot var ég heima! En það fer nú að styttast í mig ég kem eftir 2 mánuði og 9 daga!

Jæja núna eru ennþá 15 mínútur í að tíminn byrji, og ég búin með það sem ég get sagt. Best að fara bara að lesa perez...

Tveggja vikna fresti, er það slæmt?

Góðan dag gott fólk.
Í dag er mánudagur, sem þýðir aðeins eitt - þrif. Jább á mánudögum er ég "Putzfrau" og tek til í greninu ógurlega. Ég tek fyrst lest til Reutlingen, 10 mín og svo tek ég strætó í næstum klukkutíma, sem líður reyndar rosalega fljótt. Ég hef nefnilega nóg að skoða í strætóferðinni, það er ekki nóg með það að leiðin sem við förum er alveg rosaleg falleg, heldur er alltaf sama fólkið með mér í strætó, sem er alltaf troðfullur og þarf ég að standa stundum hálfa leiðina. Afhverju þurfa Þjóðverjar að vera svona hallærislegir?? Ein samferðakona mín er svo föst in the eigthies og fílar það. Önnur klæðir sig eins og hún sé sjötug en er rétt um þrítugt, situr alltaf með fílusvip og skoðar fólkið í kringum hana, munurinn á okkur er sá að hún gerir það með mjög svo gagnrýnu augnaráði, já ég veit ég er að gagnrýna, en ég er útlendingur, ég má, auk þess hef ég gaman að þessu og brosi til fólks. Svo er það stelpan sem sefur alltaf í strætó og missir ALLTAF af stoppinu sínu, magnað. Feiti feiti sem þarf tvö sæti, sem er stórmerkilegt, sérstaklega því mér finnst þýskt fólk flest allt bara mjög fit, því stendur feitt fólk virkilega út. Einn strákurinn lítur alveg út eins og Yu-Ki-Oh. Mismunandi fólk mætti áfram telja, en eitt eiga þau öll sameiginlegt - þau eru öll í ljótum skóm.
Jæja svo kem ég á leiðarenda og þríf í 4 klst. - jakk. Svo fer ég heim og ligg vanalega að drepast í bakinu allt kvöldið uppí rúmi því ég hamast svo þessa 4 tíma til þess að ná að gera sem mest.
Núna þarf ég að drífa mig, lestin fer eftir 15!

Já ég veit

þetta er til háborinnar skammar! Ég skrifaði ekkert um það þegar hún Inga mín var hérna, en það var alveg yndislegt, en ég var svo miður mín þegar hún fór að ég gat ekki skrifað, alveg satt, ég grét og grét. Ég skrifaði ekkert um það þegar Udi kom tilbaka, ég hef bara ekkert skrifað lengi!
En já að hún systir mín hafi loksins komið til mín og séð fallega bæinn minn er enn eins og í draumi. Við nutum þess aðallega bara að vera með hvorri annarri og að borða hræðilega góðan mat, en Inga smakkaði falafel hérna og henni fannst það svo hræðilega gott að við borðuðum þar 2x á einum degi! Við skoðuðum líka Tübingen, sem er svo fallegur bær, og svo fórum við einn daginn í smá ferðalag og skoðuðum 2 kastala, Hohenzollern og Lichtenstein. Henni leist voða vel á Tübingen og langar að koma aftur og ætla ég að vona að hún geri það. Ég hugsaði í margar vikur eftir "ohhh hér var ég með henni Ingu minni" og fékk tár í augun. En lífið heldur víst áfram og ég hlakka bara til næstu heimsóknar.
Já og svo er Udi auðvitað löngu kominn og núna er skólinn byrjaður aftur og því situr hann nú fastur við skrifborðið og lærir, hann er svo ótrúlega duglegur, vildi óska að ég væri svona.

Í gær skelltum við okkur (ég og útimaðurinn) í smá göngutúr, sem endaði í svaka mótmælum þar sem fólk hafði safnast niðri í miðbæ umkringt vel útbúnum lögreglumönnum, með hjálma og allt tilheyrandi. Það var verið að mótmæla því að alltaf aðfarakvöld/nótt 1. maí safnast tvö bræðralög, Germania og Allemania, á Österberg og ganga síðan niður í miðbæ með kyndla í hendi og koma sér svo fyrir framan Stiftskirche og syngja þar allan þjóðsönginn, þar á meðal bönnuðu versin (Deutschland, Deutschland über alles). Þetta er aðsjálfsögðu ekki vel liðið , enda í anda nasista, og þurfa þeir því allan tímann á lögreglufylgd að halda, sem eru fleiri en þeir sem syngja. Mótmælendur safnast sem sé saman og öskra allskonar slagara eins og t.d. "Erste Mai, Burschi Frei!" sem á íslenskri tungu væri: "Fyrsti maí, bræðrafélags frír" og reyna að yfirgnæfa bræðurna. Síðan er hent í þá fúleggjum og fleirum skemmtilegheitum. Þetta er orðin löng tradition, þetta skiptið fór allt frekar friðsamlega fram, þó að þeir hafi stoppað stutt hjá Stiftskirche þar sem ekkert í þeim heyrðist því lætin í mótmælendum voru svo mikil og eins höfðu radikal vinstrisinnaðir nú þegar reynt að hindra að þeir kæmust að Stiftskirche. Svaka þýskt, ekki eitthvað sem maður upplifir á Íslandinu gamla, enda held ég að þessir bræður væru líka bara barðir í tætlur niðri í bæ hverja helgi!
Jæja ég ætla að drífa mig út. Er að fara að hitta hann Níels minn, nýta síðustu dagana sem ég hef hann hérna, en hann er að fara aftur heim til Íslands. Ég á eftir að sakna hans!